وزیر اعظم شہباز شریف نے انکشاف کیا ہے کہ عمران خان نے ایک ماہ پہلے مشترکہ کاروباری دوست کے ذریعے مذاکرات کی پیش کش کی، وہ آرمی چیف کی تقرری اور انتخابات سے متعلق بات چیت کرنا چاہتے تھے، میں نے انکار کیا تاہم میثاق جمہوریت اور میثاق معیشت پر بات چیت کا کہا،عمران خان نے کہا تین نام میں بھجواتا ہوں تین آپ دیں مل کر آرمی چیف لگا لیتے ہیں، میں نے شکریہ کہہ کر انکار کردیا۔
لاہور میں وی لاگرز سے گفتگو کے دوران وزیراعظم نے کہا کہ عمران خان دو معاملات کو بات چیت کے ذریعے طے کرنا چاہتے تھے، پہلا معاملہ آرمی چیف کی تقرری اور دوسرا انتخابات۔ میں نے انکار کیا تاہم میثاق جمہوریت اور میثاق معیشت پر بات کرنے کی پیشکش کی۔
وزیراعظم نے کہا کہ عمران خان نے کہا کہ تین نام میں بھجواتا ہوں تین آپ دیں مل کر آرمی چیف لگا لیتے ہیں، میں نے شکریہ کہہ کر انکار کردیا، عمران خان کو پیغام بھجوایا کہ یہ ایک آئینی فریضہ ہے جو وزیراعظم نے ادا کرنا ہوتا ہے۔ شہباز شریف نے کہا کہ ڈی جی آئی ایس آئی لیفٹیننٹ جنرل ندیم احمد انجم نے مجھ سے اجازت لے کر پریس کانفرنس کی۔
