اسلام آباد: پبلک اکاؤنٹس کمیٹی نے جسٹس مظاہر نقوی کی آمدن، اثاثوں کی تفصیلات اور بیرون ملک سفر کی ہسٹری 15 دنوں میں طلب کرلی۔
چیئرمین نور عالم خان کی زیر صدارت پی اے سی کا اجلاس ہوا، جس میں 14 میں سے 13 ارکان نے جسٹس مظاہر نقوی کے اثاثوں کی چھان بین کی اجازت دی۔ صرف سینیٹر محسن عزیز نے جسٹس مظاہر نقوی کے اثاثوں کی چھان بین کی مخالفت کی۔
چیئرمین نور عالم نے دوران اجلاس کہا کہ آڈیٹر جنرل مظاہر علی نقوی کے پلاٹس کی کیٹگریز کی تحقیقات کرکے رپورٹ جمع کرائیں جبکہ نادرا اُن کے خاندان میں شامل افراد کی لسٹ فراہم کرے۔
نور عالم نے کہا کہ یہ جسٹس مظاہر یا کسی ایکس وائی کا ایشو نہیں، یہ کرپشن کا ایشو ہے، اس لیے نہیں چھوڑوں گا۔ اگر میری بہن، بیٹی، بچوں کے بھی اثاثے آمدن سے زائد ہیں تو پیچھا کروں گا۔
انہوں نے یہ بھی کہا کہ پی اے سی کے آئندہ اجلاس میں کوئی غیر حاضر ہوا تو سمن جاری کروں گا۔ اور اگر آئندہ اجلاس میں چیف سیکرٹریز نہ آئے تو وارنٹ جاری کروں گا۔
