بھارتی فضائیہ کے نئے سربراہ کی پاکستان اور چین کو پرانی گیدڑ بھبکیاں

رافیل طیاروں کی شمولیت سے بھارت کو پاکستان اور چین پر سبقت حاصل ہوجائے گی۔ راکیش کمار (فوٹو: فائل)

بھارتی میڈیا کے مطابق انڈین ایئر فورس کے نئے سربراہ راکیش کمار سنگھ نے آج اپنا عہدہ سنبھال لیا ہے۔ قبل ازیں وہ فرانس سے 36 رافیل طیاروں کی 60 کروڑ بھارتی روپوں میں خریداری کے لیے بھارتی ٹیم کا حصہ تھے۔

بھارتی فضائیہ کے نئے سربراہ نے پرانی گیدڑ بھبکیاں دیتے ہوئے کہا کہ رافیل طیاروں کو انڈین ایئر فورس کا حصہ بن جانے کے بعد اسے ایس یو-30 کے ساتھ استعمال کیا جائے گا جس سے جنگی محاذ پر بھارتی فضائیہ کو پاکستان اور چین پر سبقت حاصل ہوجائے گی۔

بھارتی فضائیہ کے سربراہ نے روایتی جارحیت پسندی کا مظاہرہ کرتے ہوئے کہا کہ رافیل طیاروں کی شمولیت سے انڈین ایئر فورس کے آپریشنل صلاحیتوں میں بے پناہ اضافہ ہوجائے گا۔ ہم کسی بھی آپریشن کے لیے ہمہ وقت تیار ہیں۔

واضح رہے کہ پاکستان پہلے ہی پلوامہ جیسے جعلی حملے کی تیاری اور اس کا الزام پاکستان پر لگانے کی بھارتی سازش سے عالمی قوتوں کو آگاہ کرچکا ہے، جنگی جنون میں مبتلا مودی سرکار کی جانب سے مقرر کیے گئے انڈین ایئر فورس کے نئے سربراہ کے بیان نے نہ صرف جنگی عزائم کو بے نقاب کیا بلکہ پاکستان کے موقف پر مہر بھی ثبت کردی۔

Scroll To Top