صحت کارڈ سے ایک کروڑ پانچ لاکھ گھرانے مستفید ہوں گے،فردوس عاشق

  • احساس پروگرام وزیراعظم عمران خان کا غریبوں کا ہاتھ تھامنے اور انہیں خوشحالی کی راہ پر گامزن کرنے کا عملی اظہار ہے
  • اقدام غریب اور نادار افراد کے تحفظ کے لیے سنگ میل ثابت ہوگا،سرکاری ہسپتا لوں میں 720000 روپے تک مالیت کا علاج فراہم کیا جائیگا

اسلام آباد(صباح نیوز) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ غریب آدمی کا معیارزندگی بلند دیکھنا عمران خان کا نصب العین ہے۔ ٹویٹ میں انہوں نے کہا کہ عمران خان عام آدمی کے ساتھی ہیں، غریب آدمی کا معیارزندگی بلند دیکھنا عمران خان کا نصب العین ہے، صحت انصاف کارڈ اور احساس پروگرام وزیراعظم عمران خان کی محروموں، غریبوں اور بے کسوں کا ہاتھ تھامنے اور انہیں سماجی و معاشی خوشحالی کی راہ پر گامزن کرنے کا عملی اظہار ہیں،یہ دونوں پروگرام غریب اور نادار افراد کے تحفظ کے لیے سنگ میل ثابت ہوں گے۔ بیماری سے بڑھ کر کوئی بے بسی نہیں ہوتی۔انہوں نے کہا کہ احساس پروگرام کا مقصد ملک بھر سے غریبوں کو غربت کی لکیر سے نکال کر معاشی ترقی کا حصہ بنانا اور عدم مساوات کا خاتمہ ہے،صحت کارڈ سے ان غریبوں اور ناداروں کا علاج ممکن ہورہا ہے جو اپنے مالی حالات کے پیش نظر ہسپتا لوں کا رخ نہیں کر پاتے، صحت کارڈ سے ملک میں ایک کروڑ پانچ لاکھ گھرانے مستفید ہوں گے اور انہیں سرکاری ہسپتا لوں میں 720000 روپے تک مالیت کا علاج مفت فراہم کیا جائے گا ، وزیراعظم کے ویژن کے مطابق آئندہ 2 برسوں میں یہ کارڈ ڈیڑھ کروڑ افراد میں تقسیم کر دیئے جائیں گے۔

Scroll To Top