علی ظفر نے اپنے خلاف جاری سوشل میڈیا مہم کا پول کھول دیا

میرے خلاف جعلی سوشل میڈیا اکاؤنٹس سے مہم چلائی جارہی تھی ، علی ظفر فوٹوفائل

کراچی: نامور پاکستانی گلوکار و اداکار علی ظفر نے اپنے خلاف سوشل میڈیا پر چل رہی مہم کی پول کھولتے ہوئے کہا ہے کہ کارروائی کے بعد ان کے خلاف بننے والے سوشل میڈیا اکاؤنٹس بند کیے جارہے ہیں۔

گلوکار علی ظفر اورمیشا شفیع کا تنازعہ شدت اختیار کرتا جارہا ہے، چند روز قبل علی ظفر نے میڈیا سے گفتگو کےدوران میشا شفیع اور ان کے وکلا پر الزام لگاتے ہوئے کہا تھا کہ ان کے خلاف سوشل میڈیا پر جعلی اکاؤنٹس بناکرانہیں بدنام کیاجارہا ہے۔ ایف آئی اے کو ان جعلی اکاؤنٹس کے خلاف درخواست دی ہے کیونکہ یہ سائبر بلنگ کے زمرے میں آتاہے۔

علی ظفر نے ٹوئٹر پر ان کے خلاف بنائے جانے والے جعلی اکاؤنٹس کے اسکرین شاٹس شیئر کرتے ہوئے کہا ہے جیساکہ میں نے کہا تھا میرے خلاف سوشل میڈیا پر جعلی اکاؤنٹس بنائے گئے ہیں میں نے ان اکاؤنٹس کے خلاف کارروائی کے لیے ایف آئی اے سے رجوع کیاتھا اور میری درخواست کے بعد اب یہ اکاؤنٹس بند کیے جارہے ہیں۔

واضح رہے کہ علی ظفر اور میشا شفیع تنازعے کو ایک سال مکمل ہوگیا ہے۔ گزشتہ برس اپریل میں ہی میشا شفیع نے علی ظفر پر جنسی ہراسانی کا الزام لگایاتھا جس کے جواب میں علی ظفر نے میشا پر ایک ارب روپے ہرجانے کا دعویٰ دائر کیاتھا کچھ عرصے پہلے تک یہ معاملہ ٹھنڈا ہوگیا تھا لیکن تین روز قبل علی ظفر کی میڈیا سے گفتگو کے بعد یہ معاملہ ایک بار پھر شدت اختیار کرگیا ہے اور دونوں گلوکاروں کی جانب سے میڈیا پر ایک دوسرے کے خلاف الزامات کا سلسلہ جاری ہے۔

Scroll To Top