چالیس لاکھ فیس بک صارفین کے ذاتی ڈیٹا کا غلط استعمال

a

فیس بک نے تھرڈپارٹی ایپلی کیشنز کی جانچ پڑتال مزید سخت کردی،فوٹو: فائل

کیلی فورنیا: فیس بک نے اپنے 40 لاکھ صارفین کے ذاتی ڈیٹا کا غلط استعمال کرنے والی تھرڈ پارٹی ایپ ’مائی پرسنیلٹی‘ کو معطل کردیا ہے۔

میڈیا رپورٹس کے مطابق فیس بک کے پروڈکٹ پارٹنرشپ کے نائب صدر ائمی آرچی بونگ نے تھرڈ پارٹی کے طور پر فیس بک سے منسلک ایپ ’مائی پرسنیلٹی‘ اور دوسری سیکڑوں ایپس پر پابندی کا اعلان کیا ہے۔ اس طرح اب تک ادارہ فیس بُک 400 ایپس پر پابندی لگا چکا ہے۔

فیس بک نیوز روم میں آرچی بونگ کی ایک تازہ پریس ریلیز میں کہا گیا ہے کہ ہماری جانب سے مذکورہ ایپ کا آڈٹ کرانے کی درخواست پر کوئی عملدرآمد نہیں کیا گیا جس کے بعد یہ انتہائی قدم اٹھایا گیا ہے؛ کیونکہ واضح ہوچکا ہے کہ اس ایپ نے مناسب تحفظ کا اہتمام کیے بغیر ہی محققین اور دیگر کمپنیوں کو فیس بک صارفین کا ذاتی ڈیٹا فراہم کیا ہے، جس کی فیس بک نے سختی سے ممانعت کررکھی ہے۔

فیس بک نے اعلان کیا ہے کہ ذاتی ڈیٹا کے غلط استعمال سے متاثر ہونے والوں کو نوٹی فکیشن کے ذریعے باقاعدہ آگاہ کیا جائے گا تاہم اس سے متاثرہ صارفین کے ’فرینڈز‘ کا ذاتی ڈیٹا اور معلومات کے غلط استعمال کا کوئی ثبوت نہیں ملا اس لیے متاثرہ صارفین کے فرینڈز کو اس معاملے پر کوئی نوٹی فکیشن نہیں دیا جائے گا۔

واضح رہے کہ کیمبرج اینالیٹکا اسکینڈل سے 87 ملین صارفین کے متاثر ہونے کے بعد فیس بک نے تھرڈ پارٹی ایپس کی جانچ پڑتال سخت کردی تھی اور اس سلسلے میں اب تک معیار پر نہ اترنے والی 400 سے زائد ایپلی کیشنز کو معطل کیا جاچکا ہے۔

البتہ، بعض ٹیکنالوجی ماہرین فیس بُک کے اس فیصلے کو پراسرار بھی کہہ رہے ہیں کیونکہ ’’مائی پرسنیلٹی‘‘ ایپ، برطانیہ میں نفسیاتی تحقیق کے ایک ادارے نے تیار کروائی تھی جس کا مقصد نفسیاتی تجزیئے کی غرض سے، سوال و جواب کے ذریعے صارفین سے معلومات جمع کرنا تھا۔ یہ خالصتاً ایک تحقیقی منصوبہ تھا جس کے تحت مائی پرسنیلٹی ایپ 2007 سے 2012 تک فعال رہی۔ تب سے اب تک یہ ایپ مکمل طور پر غیر فعال ہے۔

تاہم، گزشتہ دنوں یہ بات ضرور سامنے آئی تھی کہ کسی نامعلوم تحقیق کار نے ’’مائی پرسنیلٹی‘‘ کا اچھا خاصا ڈیٹا ’’گٹ حب‘‘ (GitHub) نامی ہوسٹنگ سروس کی ویب سائٹ پر شیئر کرادیا تھا۔ یہاں عام طور پر کمپیوٹر کے ماہرین اور سافٹ ویئر انجینئر اپنے پروگرامز کا سورس کوڈ شیئر کراتے ہیں۔

Scroll To Top