خانہ کعبہ میں طواف اور نماز پڑھنے والوں کے فی گھنٹہ اعداد و شمار جاری

k

مسجد الحرام میں فی گھنٹہ 2 لاکھ 78 ہزار افراد نماز ادا کرتے ہیں، سرکاری اعداد وشمار (فوٹو:فائل)

جدہ: سعودی حکام کے مطابق حج کے موقع پر مسجد الحرام میں ایک گھنٹے میں ایک لاکھ 70 ہزار عازمین طواف کی سعادت حاصل کرتے ہیں۔

غیرملکی خبر رساں ادارے کے مطابق سعودی حکام کی جانب سے ایک رپورٹ جاری کی گئی ہے جس میں خانہ کعبہ کے گرد طواف کرنے اور مسجدالحرام میں نماز ادا کرنے والے عازمین کے اعداد و شمار جاری کیے گئے ہیں۔

سرکاری ادارہ شماریات کی جانب سے جاری کردہ رپورٹ کے مطابق اسلامی سال 1439ھ میں دنیا بھر سے لاکھوں فرزندان توحید حج کی ادائیگی کے لیے حرم مکہ میں ہیں۔ ایک اندازے کے مطابق مسجد حرام میں فی گھنٹہ 2 لاکھ 78 ہزار افراد نماز ادا کرتے ہیں جب کہ ایک گھنٹے میں ایک لاکھ 70 ہزار عازمین حج خانہ کعبہ کے طواف کی سعادت حاصل کرتے ہیں۔

اس خبرکوبھی پڑھیں: حجاج کرام منیٰ پہنچ گئے

رپورٹ میں یہ بھی بتایا گیا ہے کہ عازمین حج کو مسجد الحرام میں 2 ہزار ٹن اور مسجد نبویؐ میں روزانہ 300 ٹن آبِ زم زم پیش کیا جاتا ہے جس کے لیے دونوں مساجد کی نگران جنرل پریذیڈنسی کے 10 ہزار ملازمین مامور ہیں جو 54 ہزار 501 آلات اور مشینوں کی مدد سے عازمین کی معاونت کرتے ہیں۔

علاوہ ازیں مسجد نبویؐ اور مسجد حرام میں آب زم زم صرف کرنے کے لیے 25 ہزار تھرماس بھی لگائے ہیں جو چوبیس گھنٹے مصروف رہتے ہیں۔ عازمین حج کے سامان کی منتقلی کے لیے 13 ہزار 560 ٹرالیاں موجود ہیں جن میں 700 برقی ٹرالیاں بھی شامل ہیں۔

مسجد حرام میں 20 مؤذن باری باری نمازوں کی اذان دیتے ہیں جب کہ 10 آئمہ کرام اور 123 طواف گائیڈ سرگرم ہیں۔ مسجد حرام میں انگریزی، فرانسیسی ،اردو، ملاوی اور دیگر کئی زبانوں میں قرآن پاک کے ترامیم اور تفاسیر بھی موجود ہیں جن سے عازمین حج استفادہ کرسکتے ہیں۔

Scroll To Top