عمران خان 18اگست کو وزیراعظم کے عہد ے کا حلف اٹھائیں گے

  • تقریب ایوان صدر میں ہوگی جو کہ انتہائی سادہ اور پرُ وقار ہوگی جس میںچند سو لوگ شرکت کرینگے، صدر ممنون حسین نے نو منتخب وزیراعظم کی حلف برداری کے لیے غیر ملکی دورہ ملتوی کر دیا
  • نو منتخب وزیر اعظم منسٹر زانکلیو میں رہائش اختیار کریں گے، جہاں ضروری تعمیر و مرمت کا کام جاری ہے جس کے تمام اخراجات عمران خان اپنی جیب سے ادا کرینگے ، جب تک یہ کام مکمل نہیں ہوتا پنجاب ہاﺅس میں قیام کریں گے، فواد چودھری

اسلام آباد /لاہور ( این این آئی) پاکستان تحریک انصاف کے چیئرمین عمران خان جشن آزادی کے بعد 18اگست کو وزارت عظمی کا حلف اٹھا کر ملک کی باگ ڈور سنبھال لیں گے ۔تفصیلات کے مطابق بائیس سال کی جدوجہد کے بعد کپتان منزل کے قریب پہنچ گئے، عمران خان جشن آزادی کے بعد وزارت عظمی کا حلف اٹھائیں گے۔ اس حوالے سے پی ٹی آئی کے سینیٹر فیصل جاوید نے تصدیق کی ہے کہ عمران خان 18اگست کو وزیراعظم کا حلف اٹھائیں گے۔ تحریک انصاف کے ترجمان فواد چوہدری کا کہنا ہے کہ یقین ہے پہلے مرحلے میں ہی وزیراعظم کا فیصلہ ہوجائے گا، سادہ اکثریت کے لیے 172ارکان کی حمایت چاہیے جبکہ پی ٹی آئی کے پاس تو 181ووٹ ہیں۔ پاکستان تحریک انصاف کے سربراہ عمران خان نے وزیراعظم ہاﺅس اور پنجاب ہاﺅس میں رہائش اختیار کرنے سے انکار کرتے ہوئے کہا ہے کہ وہ بطور وزیراعظم منسٹر انکلیو میں رہیں گے۔ یہ بات پاکستان تحریک انصاف کے ترجمان فواد چودھری نے سینیٹر فیصل جاوید کے ہمراہ میڈیا کو بریفنگ دیتے ہوئے بتائی۔ میڈیا سے بات چیت کرتے ہوئے فواد چودھری نے کہا کہ سپیکر اور ڈپٹی سپیکر کا انتخاب خفیہ رائے شماری کے ذریعے ہوگا۔ انہوں نے کہا کہ عمران خان کی تقریب حلف برداری 18 اگست کو ایوان صدر میں ہوگی۔ حلف برداری کی تیاری (آج) ہفتہ سے شروع ہو جائیگی۔ انہوں نے کہا کہ تقریب میں زیادہ وسیع پیمانے پر انتظامات نہیں کئے جائینگے یہ انتہائی سادہ تقریب ہوگی، جس میں چند سو لوگ شرکت کرینگے ۔ فواد چودھری نے کہا کہ پاکستان تحریک انصاف کے سربراہ عمران خان نے وزیراعظم ہاﺅس اور پنجاب ہاﺅس میں رہائش اختیار نہ کرنے کا اصولی فیصلہ کرلیا ہے۔ انہوں نے بتایا کہ عمران خان بطور وزیراعظم منسٹر انکلیو میں رہیں گے ، منسٹر انکلیو میں مرمت کا کام چل رہا ہے اور یہ کام جب تک مکمل نہیں ہو جاتا اس وقت تک کچھ عرصے کیلئے عمران خان پنجاب ہاﺅس میں قیام کریں گے۔ فواد چودھری نے کہا کہ منسٹر انکلیو میں مرمت کے کام کے اخراجات عمران خان اپنی جیب سے ادا کرینگے۔ اس موقع پر میڈیا سے بات چیت کرتے ہوئے سینیٹر فیصل جاوید نے بتایا کہ عمران خان نے بطور وزیراعظم اپنی تقریب حلف برداری میں تین سابق کرکٹرز کو مدعو کرنے کا فیصلہ کیا ہے۔ انہوں نے بتایا کہ عمران خان نے بھارتی کرکٹر کپل دیو ، سنیل گواسکر اور نوجوت سنگھ سدھو کو تقریب حلف برداری میں شرکت کی دعوت دی ہے۔ انہوں نے بتایا کہ چند روز قبل سنیل گواسکر نے بھی اس بات کی تصدیق کی تھی کہ انہیں عمران خان کی جانب سے تقریب حلف برداری میں شرکت کی دعوت دی گئی ہے تاہم بھارت اور انگلینڈ کے درمیان ٹیسٹ میچ میں کمنٹری کی وجہ سے شائد وہ تقریب میں شرکت نہ کرسکیں۔ انہوں نے بتایا کہ عمران خان نے 92 ورلڈ کپ کے سٹارز کو بھی وزارت عظمی کی تقریب میں حلف برداری میں شرکت کی دعوت دی ہے۔ ایک سوال پر فواد چودھری نے کہا کہ ہماری یہ خواہش تھی کہ حلف برداری کی تقریب میں تحریک انصاف کے لاکھوں کارکن شریک ہوں لیکن چونکہ یہ تقریب ایوان صدر کی جانب سے منعقد کی جارہی ہے اس لئے تقریب میں ہمارے لاکھوں کارکن شریک نہیں ہوسکتے۔بھارتی ہائی کمشنر سے ملاقات کے حوالے سے فواد چودھری نے کہا کہ پڑوسی ممالک سے برابری کی بنیاد پر تعلقات چاہتے ہیں ، بھارتی ہائی کمشنر نے عمران خان سے ملاقات کی ہے جس میں پی ٹی آئی سربراہ نے پاکستانی موقف ان کے سامنے رکھا ہے۔ ایک اور سوال پر انہوں نے کہا کہ قومی اسمبلی کے ڈپٹی سپیکر کے امیدوار کا نام بھی جلد سامنے آ جائے گا۔ فواد چودھری نے بتایا کہ بھارتی ہائی کمشنر نے بھارتی کرکٹ ٹیم کے دستخط کا بلا عمران خان کو تحفے میں دیا ہے ۔ پوری بھارتی کرکٹ ٹیم نے پی ٹی آئی کی کامیابی پر عمران خان کو مبارکباد دی ہے۔

Scroll To Top