قطرینہ کے لیے سمیتا پاٹل ایوارڈ، مگر کیسے؟

اس ہفتے بالی ووڈ کی سب سے دلچسپ خبر قطرینہ کیف کو سمیتا پاٹل ایوارڈ دینے کے بارے میں ہے۔ چکنی چمیلی اور شیلا کی جوانی جیسے آیٹم نمبر کرنے والی قطرینہ اس اعزاز کی حقدار ہیں یا نہیں اس بارے میں سوشل میڈیا میں زبردست بحث چھڑی ہوئی ہے اور لوگ جس انداز میں اس خبر کا مذاق بنا رہے ہیں وہ بھی پڑھنے کے لائق ہے۔

ایک موصوف کا کہنا ہے کہ قطرینہ یقیناً اس خبر کے بعد گوگل پر یہ تلاش کر رہی ہوں گی کہ سمیتا پاٹل آخر ہیں کون۔ ایک ٹویٹ میں کہا گیا کہ قطرینہ کو سمیتا پاٹل ایوارڈ ملنا ساجد خان کو آسکر ملنے جیسا ہے۔

ویسے قطرینہ کو یہ اعزاز دینے کے اعلان کے بعد تو غالباً خود سمیتا پاٹل کی روح کانپ گئی ہوگی اور اگر اس ایوارڈ کا میعار یہی رہا تو کہیں ایسا نہ ہو کہ اگلے سال راکھی ساونت خود کو اس ایوارڈ کا حقدار قرار دیدیں۔

رشی کپور یوں تو سوشل میڈیا پر ضرورت سے زیادہ ہی سرگرم رہتے ہیں اور چیلنج کرنے والوں کو اپنی ٹویٹس کے ذریعے منہ توڑ جواب بھی دیتے ہیں، لیکن خبر ہے کہ اس ہفتے انھوں نے سچ مچ ایک نامہ نگار کا منہ توڑنے کی کوشش کی۔

کپور خاندان دوسرے فلمی خاندانوں کی طرح ہر سال گنپتی فیسٹیول مناتا ہے اور اس فیسٹیول میں بھگوان گنپتی کی مورتی کو سمندر میں بہانے کی رسم ادا کی جاتی ہے۔ رشی کپور جب اپنے بھائی رندھیر کپور، راجیو کپور اور بیٹے رنبیر کپور کے ساتھ ساحل سمندر کے لیے نکلے تو حسب معمول میڈیا بھی انکے ساتھ چل پڑا۔ اس دوران ہجوم اور ہنگامہ اتنا بڑھا کہ تصویریں لینے پر دونوں بھائی برہم ہو گئے اور میڈیا کے ساتھ ہاتھا پائی شروع کر دی۔

اس واقعے پر میڈیا اور سوشل میڈیا میں کافی ہنگامہ ہوا اور یہ بات رشی کپور کو اچھی نہیں لگی۔ لیکن رشی کپور کو یہ بھی یاد رکھنے کی ضرورت ہے کہ وہ ایک مشہور شخصیت ہیں اور اس طرح عوامی مقامات پر نکلیں تو ایسے ہنگاموں، ہجوم اور میڈیا کے لیے تیار رہیں۔

خبریں تھیں کہ اگلے سال 26 جنوری کے موقع پر شاہ رخ اور ریتک اپنی اپنی فلموں ’رئیں‘ اور قابل‘ کے ساتھ ٹکرائیں گے۔ اب ایسی خبریں بھی آ رہی ہیں کہ 2018 میں بھی دونوں ایک دوسرے کے آمنے سامنے آ سکتے ہیں۔ ریتک اپنی فلم ’ کرش فور‘ اور شاہ رخ آنند ایل رائے کی فلم لیکر ایک وقت پر باکس آفس پر نمودار ہونگے۔

یہ فلمیں ریلیز ہونے میں ابھی کافی وقت باقی ہے لیکن چونکہ سال کے بڑے بڑے تہواروں اور تاریخوں کی ریلیز کا اعلان پہلے ہی کر دیا جاتا ہے اس لیے اب دیکھنا ہوگا کہ دونوں فلسماز اس ٹکراؤ کے لیے تیار ہوں گے یا پھر نئی تاریحوں کا اعلان کریں گے کیونکہ چاہے وہ شاہ رخ ہوں یا ریتک دونوں ہی اپنی اپنی فلاپ فلموں کے بعد ایک اور فلاپ فلم کے لیے تیار نہیں ہوں گے۔

کرن جوہر کی فلم ’اے دل ہے مشکل‘ کی ریلیز سے پہلے فلم کے پروموش کے تکلفات تقریباً پورے ہو چکے ہیں یعنی فلم کے پوسٹر ٹریلرز اور تنازع سبھی کام مکمل کر لیے گئے ۔

فلم 28 اکتوبر کو ریلیز ہوگی۔ فلم کے ٹریلرز میں نوجوان رنبیر کپور اور 44 سال کی سابق مس ورلڈ ایشوریہ رائے کی کیمسٹری کے خاصے چرچے ہیں اور خبریں ہیں کہ ایش کے سسر امیتابھ بچن کو فلم میں ایش اور رنبیر کے درمیان قربت کے مناظر پسند نہیں آئے اور غالباً انہوں نے اس کا اظہار کرن جوہر کے سامنے بھی کیا۔ اب معلوم نہیں کہ یہ بات واقعی درست ہے یا پھر یہ بھی فلم کے پروموشن کا حصہ ہے۔

Scroll To Top