سلمان خان کوکالے ہرن شکار کیس میں 5 سال قید کی سزا

bسلمان خان جیل کی روٹی کھائیں؛ جج کے ریمارکس؛ فوٹورائٹرز

جودھ پور: بھارتی ریاست راجستھان کی عدالت نے سلمان خان کو کالے ہرن شکار کیس میں 5 سال قید اور 10 ہزار روپے جرمانے کی سزا سنادی ہے۔

بالی ووڈ سپر اسٹار سلمان خان پر الزام تھا کہ انہوں نے 19 سال قبل 1998 میں راجستھان کے شہر جودھ پور میں فلم’’ہم ساتھ ساتھ ہیں‘‘کی شوٹنگ کے دوران اجازت نہ ہونے کے باوجود نایاب کالےہرنوں کا شکار کیا۔ مقدمے میں اداکارہ سونالی باندرے، تبو، نیلم اور سیف علی خان بھی نامزد تھے۔ کیس کی گزشتہ سماعت28 مارچ کو ہوئی تھی جس میں مجسٹریٹ عدالت کے جج دیو کمار کھتری نے فیصلہ محفوظ کیا تھا۔ عدالت نے حکم دیا تھا کہ فیصلہ 5 اپریل کو سنایا جائے گا اور اس موقع پر تمام ملزمان عدالت کے روبرو پیش ہوں۔

عدالتی حکم کے مطابق سلمان خان سمیت تمام ملزمان عدالت میں پیش ہوئے، عدالت نے سلمان خان کو تحفظ جنگلی حیات ایکٹ سیکشن 51 کے تحت مجرم قرار دیتے ہوئے 5 سال قید اور 10 ہزار روپے جرمانہ عائد کردیا۔ کیس کے دیگر ملزمان کو شک کا فائدہ دیتے ہوئے بری کردیا گیا۔ عدالتی فیصلے کے بعد سلمان خان کو کمرہ عدالت سے ہی گرفتار کرلیا گیا۔

بعد ازاں سلمان خان کو میڈیکل چیک اپ کے بعد جودھ پور کی سینٹرل جیل منتقل کردیا گیا جب کہ جودھ پور کے ڈی آئی جی جیل کا کہنا تھا کہ سلمان خان کے ساتھ عام قیدیوں والا سلوک روا رکھا جائے گا جب کہ سلمان خان نے خود بھی کسی قسم کی خاص رعایت نہیں مانگی یہاں تک کہ الگ سے پانی کی فرمائش بھی نہیں کی۔ انہوں نے کہا کہ سلمان خان کو وارڈ نمبر 2 میں منتقل کیا جائے گا جہاں ان کی سیکیورٹی کے سخت انتظامات کیے جائیں گے اور انہیں قیدی نمبر 106 دیا گیا ہے جب کہ کل تک انہیں جیل کا یونیفارم دے دیا جائے گا۔

عدالتی فیصلہ سنتے ہی سلمان خان کی بہنیں ارپیتا اور الویرا رو پڑیں جس کے بعد عدالت میں جذباتی مناظر دیکھے گئے۔ سماعت کے دوران جج نے ریمارکس دیتے ہوئے کہا’’سلمان خان آج جیل کی روٹی کھائیں۔‘‘

دوسری جانب سلمان خان کی جانب سے ضمانت کیلئے درخواست دائر کردی گئی ہے جس پر کل صبح ساڑھے دس بجے سماعت ہوگی  لہٰذا سلمان خان کو ضمانت ملنے تک پوری رات جودھ پور سینٹرل جیل میں گزارنی پڑے گی۔

واضح رہے کہ سلمان خان ان دنوں، فلم ’’ریس3‘‘، ’دبنگ3‘‘اور’’بھارت‘‘جیسی میگا بجٹ کی فلموں کی شوٹنگ میں مصروف ہیں اوراگر سلمان خان کو جیل ہوجاتی ہے تو فلمسازوں کو تقریباً 400سے 600 کروڑکا نقصان اٹھانا پڑے گا۔

Scroll To Top