ترقیاتی منصوبوں کی مانیٹرنگ کے ذریعے شفافیت کو یقینی بنایا جا رہا ہے، شہباز شریف

  • شفافیت حکومت پنجاب کا طرہ امتیاز ہے،ترقیاتی منصوبوں میں اربوں روپے کی بچت کرکے قابل تقلید تاریخی مثال قائم کی
  • منصوبوں میں فنڈز کے شفاف استعمال کو یقینی بنایا جائے، عوام کے خون پسینے کی کمائی کسی کو ضائع کرنے کی اجازت نہیں دیں گے، متعلقہ حکام کو ہدایت
لاہور، وزیر اعلیٰ پنجاب شہباز شریف سالانہ ترقیاتی پروگرام کے جائزہ اجلاس کی صدارت کر رہے ہیں

لاہور، وزیر اعلیٰ پنجاب شہباز شریف سالانہ ترقیاتی پروگرام کے جائزہ اجلاس کی صدارت کر رہے ہیں

لاہور(اےن اےن آئی) وزیراعلیٰ پنجاب محمد شہبازشریف نے کہا ہے کہ پنجاب میں ترقی کے نئے معیار قائم کریں گے۔ ڈویلپمنٹ پراجیکٹس کی ہر سطح پر مانیٹرنگ کرکے شفافیت کو یقینی بنایا جا رہا ہے، ترقیاتی منصوبوں کے تعمیراتی معیار پر کوئی سمجھوتہ نہیں کیا جائے گا۔ وزیراعلیٰ محمد شہبازشریف نے یہ بات اعلیٰ سطح کے اجلاس سے خطاب کرتے ہوئے کہی جس میں سالانہ ترقیاتی پروگرام پر پیش رفت اور صوبہ بھر میں جاری مختلف محکموں کے ترقیاتی منصوبوں کا جائزہ لیاگیا۔ وزیراعلیٰ نے منصوبوں کی جلد تکمیل کے لئے ہدایات جاری کیں۔ وزیراعلیٰ نے اجلاس سے خطاب کرتے ہوئے کہا کہ تعلیمی اداروں کی عمارتوں کی تعمیر کو جلد سے جلد پایہ تکمیل تک پہنچایا جائے اور نوجوانوں کو کھیل اور خداداد صلاحیتوں کے اظہار کے لئے سپورٹس کمپلیکس سمیت کھیل سے متعلق دیگر منصوبوں کو شفافیت کے ساتھ مکمل کیا جائے۔ اجلاس میں بتایا گیا کہ پنجاب کے 4 اضلاع میں ٹیچنگ ہسپتالوں کی تعمیر کا پہلا فیز مکمل ہونے کو ہے جبکہ دوسرے فیز میں 4 اضلاع میں میڈیکل کالج قائم کئے جا رہے ہیں۔ وزیراعلیٰ نے کہا کہ ترقیاتی منصوبوں میں شفافیت حکومت پنجاب کا طرہ امتیاز ہے اور حکومت پنجاب نے ترقیاتی منصوبوں میں اربوں روپے کی بچت کرکے قابل تقلید تاریخی مثال قائم کی ہے۔ عوامی فلاح و بہبود کے ترقیاتی منصوبوں کی جلد از جلد تکمیل کو یقینی بنایا جا رہا ہے۔انہوں نے کہا کہ حکومت پنجاب تمام چھوٹے بڑے شہروں کی یکساں ترقی کے وژن پر عمل پیرا ہے اور ملک کی تاریخ میں پہلی مرتبہ جنوبی پنجاب کی آبادی کے تناسب سے زیادہ بجٹ مختص کیا گیا۔ انہوں نے کہا کہ ترقیاتی منصوبوں میں شفافیت اور معیار اپنی مثال آپ ہے اور حکومت پنجاب کے ترقیاتی وژن کو نہ صرف ملکی بلکہ غیر ملکی ادارے بھی سراہتے ہیں۔ وزیراعلیٰ نے کہا کہ تعلیم، صحت اور زراعت اور دیگر شعبوں میں اختراعی منصوبے حکومت پنجاب کی پہچان بن چکے ہیں۔ وزیراعلیٰ نے ہدایت کی کہ ترقیاتی منصوبوں کی تیاری میں عوامی فلاح و بہبود اور ضروریات کو ترجیح دی جائے اور منصوبوں میں فنڈز کے شفاف استعمال کو یقینی بنایا جائے۔ عوام کے خون پسینے کی کمائی کسی کو ضائع کرنے کی اجازت نہیں دیں گے۔ ترقیاتی منصوبوں میں شفافیت کے وژن کی خلاف ورزی کرنے والوں کو برداشت نہیں کیا جائے گا۔ اجلاس میں رکن قومی اسمبلی حمزہ شہباز ، صوبائی وزراءعائشہ غوث پاشا، ملک ندیم کامران، متعلقہ سیکرٹریز اور دیگر حکام نے شرکت کی۔

Scroll To Top