اتحادی جماعتوں کے تحفظات دور کریں گے: عمران خان

متحدہ قومی موومنٹ پاکستان ہماری اہم اتحادی جماعت ہے ہے، خالد مقبول صدیقی کو کابینہ میں واپس لائیں گے

اسلام آباد(صباح نیوز)وزیراعظم عمران خان نے کہا ہے کہ حکومت اتحادی جماعتوں کے تمام تحفظات کو دور کرے گی اور انھیں ہمیشہ ساتھ لے کر چلے گی۔منگل کو کابینہ کے اجلاس سے خطاب کے دوران عمران خان کا کہنا تھا کہ اتحادی جماعتوں نے ہر مشکل وقت میں حکومت کا ساتھ دیا، انھیں ساتھ لے کر چلیں گے۔وزیراعظم عمران خان کا کہنا تھا کہ اتحادی جماعتوں کے تحفظات ختم کرنے کیلئے حکومتی کمیٹی بنائی جس کا ان کے ساتھ رابطہ ہے۔ ہم اپنے اتحادیوں کے تحفظات دور کریں گے ،وزیراعظم عمران خان کے زیر صدارت وفاقی کابینہ کا اجلاس ہوا جس میں امریکا ایران کشیدگی، عالمی حالات اور ملک کی سیاسی ومعاشی صورتحال کا بھی جائزہ لیا گیا۔ ذرائع کے مطابق وفاقی کابینہ نے 16 نکاتی ایجنڈے پر غور کیا۔ وزارتوں، اداروں اور متعلقہ محکموں کے انتظامی امور پر بھی وزیراعظم کو اجلاس میں بریفنگ دی گئی۔وفاقی کابینہ نے اقتصادی رابطہ کمیٹی اور قانون سازی سے متعلق کمیٹی کے فیصلوں کی توثیق کی۔ اجلاس میں پاک سعودی ایئر سروسز کے معاہدے، ہیوی انڈسٹریز ٹیکسلا بورڈ میں پروڈکشن کنٹرول کے ممبر اور پاکستان محتسب کراچی سیکرٹریٹ میں انچارج ممبر کی تقرری کی منظوری دی گئی۔فاٹا اور گلگت بلتستان کے 4 فیصد کوٹہ کی تقسیم پر رپورٹ کابینہ کو پیش کی گئی۔ اجلاس میں پی ایس او کے ایم ڈی اور سی ای او کی تقرری کا معاملہ موخر کر دیا گیا اجلاس میں نئی ایئر لائن ایئر سیال کی لانچنگ کی منظوری بھی دی گئی۔ذرائع کے مطابق کابینہ اجلاس میں اتحادی جماعتوں کے تحفظات پر بھی بات چیت کی گئی۔ میڈیا رپورٹس کے مطابق اس موقع پر وزیراعظم عمران خان کا کہنا تھا کہ ایم کیو ایم اہم اتحادی ہے، خالد مقبول صدیقی کو کابینہ میں واپس لائیں گے، اتحادیوں کے تمام مطالبات پر پیشرفت ہورہی ہے، حکومتی کمیٹی تمام اتحادیوں سے مسلسل رابطے میں رہتی ہے۔

You might also like More from author