انصاف کے دو ترازو کے خلاف ملک گیر تحریک چلائیں گے، نواز شریف کی عدلیہ کو دھمکی

1028512-nawazlondon-1513445767-751-640x480

میری جدوجہد پاکستان میں قانون اور آئین کی حکمرانی کے لیے ہے، سابق وزیراعظم-

 لندن: مسلم لیگ (ن) کے صدر اور سابق وزیراعظم نوازشریف کا کہنا ہے کہ انصاف کے دوترازو نہیں چلیں گے اور اس کے خلاف بھرپور تحریک چلائیں گے  جب کہ قانون و آئین کی حکمرانی کے لیے جو کرنا پڑا کروں گا۔

لندن میں میڈیا سے بات کرتے ہوئے سابق وزیراعظم نوازشریف نے عمران خان کی نااہلی سے متعلق سپریم کورٹ کے فیصلے پر رد عمل دیتے ہوئے کہا کہ مجھے کہا جارہا ہے کہ تنخواہ نہیں لی لیکن لاکھوں پاؤنڈز کے کاروبار کو یہ اثاثہ نہیں کہہ رہے جب کہ میری خیالی تنخواہ کو انھوں نے اثاثہ مان لیا۔ انہوں نے کہا کہ پہلے ہی کہہ دیا تھا کہ عمران اور جہانگیر ترین کے مقدموں میں مجھے ہی نا اہل کیا جائے گا، جو فیصلہ کل آیا وہ خود اپنے منہ سے بول رہا ہے۔

نوازشریف کا کہنا تھا کہ انصاف کے دو ترازو نہیں چلیں گے اور نہ اس طرح کا انصاف پاکستان میں چلے گا، ہم اس کے خلاف بھرپور تحریک چلائیں گے جب کہ قانون اور آئین کی حکمرانی کے لیے جو کرنا پڑا کروں گا اور میری جدوجہد پاکستان میں قانون اور آئین کی حکمرانی کے لیے ہے۔

Scroll To Top